[私家導遊] "馬拉話旅行雞精版"

寫沙巴的東西該差不多了。這篇該是最後一篇。

千身萬苦，長途跋涉，出盡法寶。。才請求到 [私家導遊]  出手寫這篇 "馬拉話旅行雞精版"

馬拉旅行食野，傍身必備。

***

沙巴通街都係中文，完全唔使怕語言不通。事實上，華人通常都聽得明廣東話（可能唔識講，佢會用國語答你）。

不過叫飲品嗰陣，學識幾個馬拉話單字會好有用。因為好大機會唔係華人幫你落單，而且飲品好視乎個人口味，走奶少甜凍定熱，落錯單就無謂啦。

叫嘢食反而唔使擔心。一來有menu比你手指指，二來好多時華人老闆見到遊客就會主動黎落單，但係飲品好可能外判左比馬來／印度人。

先講基本野：茶同咖啡。

• 奶茶 Teh (爹）
• 咖啡 Kopi (個B)

Default係熱飲，有奶，落左糖。

要加加減減，就要喺爹或者個B後面加d野：

• 走奶 O (痾)
• 走糖走奶 kosong (個song)
• 少甜 kurang manis (顧冷慢nis) (潮州打冷個冷，高音d)
• 凍飲 bing (冰）

例如，熱齋啡要糖就係Kopi-O (個B痾), 凍奶茶少甜就係Teh bing kurang manis (爹冰顧冷慢nis)。

佢地落糖好似唔使錢咁。強烈建議各位，除非你真係好食得甜，否則請 (顧冷慢nis)。

除左基本茶啡，佢地仲有d香港跟餐要加十幾蚊既「特飲」，三色冰、紅豆冰、薏米水之類。

特別推介薏米水、 話梅桔仔冰同埋鐵沙梨umbra。

• 薏米水 Barli (霸lee)

Default一樣係熱同落左糖，所以要凍飲或者少甜走甜就用番上面d字啦。凍薏米水走糖就係Barli bing kosong (霸lee冰個song)。消暑一流。

• 桔仔冰 Kit Chai

佢地個menu 真係咁寫架。你只需要用廣東話講「桔仔冰」就得。有d地方係原粒桔仔同話梅，有d餐廳（例如大茄來）會將桔仔打碎，成杯野變成綠色，叫桔仔汁。佢地一樣會落糖，你一樣可以顧冷慢nis。

如果你想要杯熱桔仔潤下喉，就要講桔仔扮nas啦(panas, 熱）。

• 鐵沙梨 Umbra (暗bra)

香港冇呢樣生果。有d似打碎桔仔冰，成杯綠色，酸酸甜甜。

食得熱氣野多，仲可以叫杯涼茶下火。好多地方都有夏枯草（佢地有時會寫夏火草）。放心，你用正宗廣東話，對住一位正宗馬來朋友講「夏，枯，草」，佢真係會識得比杯正宗既夏枯草你。

最後一提，如果你(有幸)聽到華人用國語或者廣東話問你「飲咩水？」，唔使驚，佢唔係迫你飲Evian或者Perrier。對馬拉華人黎講，「水」係指液體，爹、個B、霸lee同桔仔冰，全部都係水。

***